*حقوق اللوحة محفوظة لصاحبها
الأماني الثورجية
العيون الفيها ثورة
حارسة أحلامنا البهية
الأماني النابعة سُمره
شايلة هم الناس قضية
ليكي هامات كل نضالنا
الدماء الطاهرة حيّة
الأماني عيون صغارنا
جايبة بكره في هدية
ليكي صوت كل المواني
والشوارع السندسية
*************
الأماني تضوي ليلنا
يوم تطرز حُلم نيلنا
الشهيد شايف عديلنا
والبعيد راجع يجيلنا
لا بنفقد روح بريئة
طالبة حقها شان مصيرنا
ما كفاها بلدنا وجعة
ما كفاهو يضحي جيلنا
والأماني تكون ضحية
الأماني الثورجية
العيون الفيها ثورة
حارسة أحلامنا البهية
الأماني النابعة سُمره
شايلة هم الناس قضية
ليكي هامات كل نضالنا
الدماء الطاهرة حيّة
الأماني عيون صغارنا
جايبة بكره في هدية
ليكي صوت كل المواني
والشوارع السندسية
**************
الأماني البيها شوفنا
المحاربة ونازعة خوفنا
المُآزرة في كل ظروفنا
واقفة صامدة وفايضة دهشه
في خسوفنا
وفي كسوفنا
وفي مدارات المواجع
كنتي بلسم للآذية
الأماني الثورجية
العيون الفيها ثورة
حارسة أحلامنا البهية
الأماني النابعة سُمره
شايلة هم الناس قضية
ليكي هامات كل قضية نضالنا
الدماء الطاهرة حيّة
الأماني عيون صغارنا
جايبة بكره في هدية
ليكي صوت كل المواني
والشوارع السندسية
**************
بكره بنحقق منالنا
نكتب التاريخ بطولة
المتاريس والهتافات
شاهدة ساندة بلدنا طولا
الشهيد في سمانا شامخ
رافع الأعلام مهُوله
ويرجع المفقود ويهتف
مافي تاني ضياع طفولة
نرسم الأفراح نغني
يلا نبني وأرح نقولا
للأماني سلام تحية
الأماني الثورجية
العيون الفيها ثورة
حارسة أحلامنا البهية
الأماني النابعة سُمره
شايلة هم الناس قضية
ليكي هامات كل نضالنا
الدماء الطاهرة حيّة
الأماني عيون صغارنا
جايبة بكرة في هدية
ليكي صوت كل المواني
والشوارع السندسية
ليست هناك تعليقات:
إرسال تعليق