أنا ما مضطربة
أنا بس يدااااب
حسيت بالغربة
وما مجنونة
وما مكتئبة
بس يدااااب
شفت الأحلام
وعرفت الدنيا
ما اسمها لعبة
******
ما زعلانة
ولا فرحانة
ماني معقدة
لا ولهانة
لا حاسة برودة
لا حاسة سخانة
انا بس يداااب
حبيت بأمانة
والريد الرادني
لقيتو خيانة
والفرح مفتاحو
عندي ضمانة
*****
ما بتباهى بالفي عروشي
وما بستعرض الشوق في شموسي
ما بحتاج لزخرفة باهتة
والزيف الفيها يبكي رموشي
ومهما الفانية سرقت مني
أنا مرتاحة ومتمددة حوشي
*********
ما بتبدل وما بتغير
ما بتسرع في خطواتي
ولا بالعيب الشين بتعير
وكل الشاف الهم هو كبير
يااااخ إطمن وشوفو صغير
وأبقى الضامن لأهدافك
وأبقى الأول وأبقى مُخير
و ما تتقبل حال الدنيا
يخطف نورك وتبقى مُسير
************
ما تستهون بالأيام
أدرس أفهم وكون نضاااام
ما تتحاشى الناس الشبهك
ما بتعوضوا ديل إلهام
ما تتمشى براك في فراغك
شوف أصحابك وأرح قداااام
ما تستنى الفرصة تجيك
كون متفائل
أسعى إليها وأبقى هُمام
وما تقول دايماً ما بتتجازف
بكرة الأمل الفيكَ يتصاعد
نور وبحور ما فيها ضلام
************
قوم إختار الشوق والعين
أرسم فرحك وخططو زييين
وأهزم خوفك وقول يا معين
أبدا وأفتح ليك كتاب
وأوعك تنسى العمر سنين
سنين محسوبة
وما معروفة نهايتك وين
عليك أخلاقك وكل أفعالك ترضى عليك بحسن الدِين
ولا تستلف الفرح الأجوف
قول للدمعة في ستين
#NAwader
ليست هناك تعليقات:
إرسال تعليق