السر والتاج
زولين في فريقاً ما فيهو نَتَاج
السر خمجان متورط تب في ريد السُرة
لكنو التاج
سجمان حظو بتريدو بنية
في شوفا علاج
__
السُرة بتصحى مع الآذان
وتشيل أحلام كنتوش وحليب
وحِليلِه صغيرة مُبرمَة هم
فوق مشلعيب
والدُردُر واقف لا ميل لا عيب
__
تدقش حواشة ملاااانه أسى
مستُورة عفاف ، مبنية قسى
لابسة الأيام عريانة فرح
مُتململة خوف ، صباح ومِساء
حفرت زرعت والدنيا عِشاء
لاقاها السر ....
سلّم وأهداها نظرات ونسة
وبلهفة سرح شاف الجواها
مُضمره فاتنة وكأنو نِسى
___
التاج مريودا
خافياهو الريدة
وماسحاهو أتر
وفي وسواس الليل إشتاقت
ويقين الصَبُر الفيها كَفر
لملم خطواتو وجاها سريع
يا بنية إتصبري الباقي جَبُر
وفي لحظة الخوف أداها أم كف
حمر عينيها خلاها جَمُر
رجعتْ تستغفر
وتتنهد هم
وتضحك بحذر
شان الجيران ما يسمعوا جِنها
ويقولوا عليها دي فاطة سَطُر
اها يوم التاج مخمور شوق لط
والشوف عاميهو وحالو خطر
صرخ السُرة.......
مفضوح أنا جاييك تسقيني مطر
يا السر سوق صحبك
تاويهو بعيد
وعيهو وقولو ما يملاني فَقُر
أنا صاحية عليهو
صابرة و واعية
مُنتظرة الباب يدقّا شُكر
وينساب الريد في عُشةِ حلال
مليانة عِيال
مُتجملة رقيص
دوبيت وشِعِر
وطقطق الباب
دفر الأوجاع
صحت المتوهمة في الريدة قمر
قامت مستعجلة على الحواشة
تكشر حال اليوم تنهر
غجرية ملامحا والأسلوب
لا حول الله يغويك بحر
قالت:....
أنا محظوظة
والسر والتاج ما شافو فهم
ما أنا ياني جميلة
وساحرة فريقنا أسماع ونظر
وفي زاوية بعيدة
سمعت صوت
بيقول يا السُرة
هووووي أوعاك نفسك تغريك
تهديك المُر بدل السُكر
وسمعت صوت تاني
يا السُرة كفاك شقي الأوهام
إتمايلي هزي شبال وسفر
اها ضاعت بين الصُح والصَاح
إحتارت وصاحت جواها شَرر
مضت الأيام
أعوام أعوام
السر في ضياعو
هناك سافر
والتاج استنكر
نسى ريد السُرة
وأخد التاية
بت عمو القالت بيهو بتفخر
وفي يوم أغبر
مشؤوم وحشة
كان جانا خبر
أنا ما صدقتو
يوم فايض هم
السُرة وداعك
كان دمعو دُرر
سافرت وكل الناس تتهامز
تتربص بيكِ شُكوك وعَتر
إلا السر عاد
كشف المستور
وبكاكِ كتير
قال فيها صفا
مُحال يتنجس ويبقى عَكر
أنصف خاطرك وفاء وتحنان
وفيك أبحر
قال كما العذراء في طُهرك
لا مسها جن لا حتى بشر
وفي جوطة الوجع الفي عينيهو
إتملكو خوف وما فكر
كيف الأجداث ملكوت أهات
والرحمة طريق للريد أخضر
والكل غافل محتاج صفعات
شان تصحى اللوعة
تهدي العاشقين
دروس وعِبر
ومهما الأنسام هبت بالشوق
تتراقص فينا الضحكة أمل
#NAwader
#السنبلة
ليست هناك تعليقات:
إرسال تعليق