اها قُومِي حِتي غُبار أمس
واتوهطي وِسطك حزام
أنغام هجيج
دلوكة في عز الزحام
وانتبهي ترقصي في الهجير
وتتشابى بيك نظرات سَعر
تاكلك وتنهش عرضك المنخور أدب ثم إنهزام
واترحطي بخيط قوي واتلفحي الرقصات مقام
ولو راوضك شيخ الفريق
صديهو بضحكة ومياعة وفي المَيعة زيدي الهم حُطام
واتقدسي واتحجبي بسراب قصير حد عِبك الفايض هَزل
والدنيا ذاته عِناد حظوظ
مرة بتصيبك ومرات بتلعن في ولادتك ، خاصراتك والمَخَاض
لعنت كمان جذع النخلة يوم آواكَ جلباب من سِناج
وإتسوددت زيتونة الحظ البِكر
وإتنهدت فأضاءت الظُلمات سراج
فتلاشت تعويذة شرورك
وإزدادت الأيات كُجور
ونفخ في صورك نَفس فَجاج
فجيت عَفاف الأمكنة
دروشت حالي وما لي علاج
اها تاني كيفن أكتبلي لُوح
ومحايتك أنتَ يقين وشَك
شكيت ونيتي صِفت عَكر
ودَوايتي يِبست دون هواء
فكأنها إتاكسدت بى ريح تصرصر والليل عَجاج
اها تاني أقدر أطردك
وأيادي جوعك تنغمس في خصري
والحيل ما شديد
وأنا ضعفي عارفك ما جديد
بس انت فكرة استفهمت فيني النضم
ونضمتك
لا قوة
لا حس
لا عِماد
وكل السكون الفيني جاط
واستسلمت بور البلاد
ما خضرت
ما أينعت كِذب السَماد
بس قُدرة في جفون المُحال
حصدت سحر من سُنبلات
اتوسدت فيكَ توب ونيل
نامت وكان حلمك مِهاد
#NAwader
#السُنبلة
ليست هناك تعليقات:
إرسال تعليق